TALOFA OUTOU UMA

"Afio maia"

 

 (Late: MAIAVA PELESA MOEA'I LEOTA)

Fanau: 28 Aukuso 1912,   Maliu: 13 Setema 1977 (65yrs).  Tama: Moea'i Leota - Avao, Satoalepai  Matautu.  Tina: Faauli Suisala Maiava - Safa'i Matautu

 

TUPUAGA: O Maiava Pelesa Moea'i Leota e sau mai le gafa o Malietoa Taulapapa: GAFA / GENEOLOGY. Malietoa Taulapapa na usu ia Fatumiti le alo o Tagaloa Afesulu ma Oloitoa faaee le gafa (fg). o Toomata (m)-male ma Iliganoa (f)-female. Toomata na usu ia Sumuane le alo o Seigafo fg. o Amituana'i (m). Amituana'i na usu ia Tinaitaala fg. o Leota Toga (m). O Leota Toga na usu ia Oilau le alo o Fagege fg. o Aumoenalogo (m). Aumoenalogo na usu ia Lagi le alo o Muagututi'a fg. o Tagaloa Lealamanu'a (m). O Tagaloa Lealamanu'a na usu ia Iao le alo o Tivai i Avao fg. o Leota Faapoifoto (m). O Leota Faapoifoto na usu ia Moli le alo o Maiava i Sato'alepai fg. o Leota Malo (m). O Leota Malo na usu ia Si'iloto le alo o Auva'a i Falealupo fg. e toalima; toatolu tama o Moea'i, Sili'u ma Tau, toalua teine o Tae'ga ma Toeitiiti. O Moea'i Leota na usu ia Faauli le afafine o Suisala i Safa'i fg. e toalima; tolu tama o Pelesa, Pailate ma Moea'i, toalua teine o Faavaoa Fao Silivama ma Sitoga Fala. O Pelesa poo Maiava i lona suafa matai mai le aiga o lona tina o Faauli Suisala ma o ia foi o le ulumatua o lona aiga tina i Safa'i. Sa usu ia Gogouli Taala Pa'u Keke Matiu o Utualii faaee le gafa e toasefulu, ono tama o Maiava Sakaria (K), Suisala Lemaota (P), Maaolegalu Lemaota (P), Aigamaua Lemaota (Iosefa T.), Uluao Tuaoimalii (Tupu U.) ma Toomata Polutele (P), toa fa teine o Faavaoa Leitufia O. Papalii, Punalilo Tuli Maea,Tutulu Tuputa Meafou ma Lemaota Sitoga Nanai Malae Sua.

E manatu o lenei faamaumauga e aoga mo fanau i le lumana'i a le aiga o loo aumau ma nopia'i i soo se tafa o le lalolagi mo nei ma-e lu-a. Ua faaamaninoina i luga o lenei upega tafailagi ina ia aua nei aveesea ai le iliai'a o le gafa, ma faapea ane ua na o se tala i le vai ma lana usuga. Ae ua fai lava le upu o le muagagana a Samoa ia Apemoemanatunatu, ae ua lé Tutuila lé mamate pei o lea talatuu ua e silafia. Aua o le tagata ma lona tupuaga, o le tagata foi ma lona faasinomaga. O le upu a le atunuu "E lelei lava le motu o le pa a ua iloa"  

Gogouli - Soifua: 23 Novema 1921.   Tina: Vaeila Faumuina Siueva o Lepea Faleata,   Tama: Taala Pa'u Keke Matiu o Utualii 

 

TUPUAGA: O Gogouli e sau mai le gafa o Matiu i Utualii lona tama: GAFA/GEOLOGY: O Polutele fg. o Poluuli, fg. o Polumanaia le ulua'i nofo i le suafa Matiu, fg. o Matiu Leasuasuofolau fg. lona alo teine o Tuioninimo na usu mai i ai Luafalemana Leitufiaoatua fg. o Matiu Poumale, fg. o Matiu Solomona (m). M. Solomona i lana usuga muamua na usu ai ia Saini le alo o Malevai o Solosolo fg. e toalima; toatolu tama o Ene, Keke ma Vili, ae toalua teine o Sose ma Tuailepea ll. O le usuga lona lua na usu ai ia Taase le alo o Foluena o Sapapalii lea e i ai Matiu Alapasa le nofo mulimuli o le aiga na maliu 1984. 

O KEKE MATIU i lana usuga muamua na usu ai ia SASA CHARLES EINGEBORENER le afafine o le palagi Siamani, e suafa ia Lemaota Salesa (Charles-Eingeborener) o Tafua Savaii fg. ua na'o PA'U le tama, peitai na toe i ai le isi usuga lona lua a KEKE ma maua ai le uso o Pa'u (half brother) e suafa ia OLOFA'I lea e i ai le suafa MATIU o loo nofo mai nei i le aiga Sa Matiu i Utualii o Matiu Lemalie Olofa'i KEKE MATIU. O PA'U poo lona igoa matai o TAALA mai Vailoa Faleata i le aiga o lona tina na usu ia Vaeila o Lepea lea e sau mai le Gafa o Faumuina Siueva. Faaee le gafa (fg). e toasefulu tasi; e toafitu tama o Salesa, Aigamaua Usoalii ma Tamapaa, Moala Sakaria, Aoelua Si'ueva, Tupu ma Toia Pa'u, e toafa teine o Gogouli Maiava, Moto Vaiva Lasalo, Fenumia'i Matagifesaua'i Faatali ma Faaiu Peapea Fesola'i. Usuga ma e na tutupu mai ia Gogouli: 1). Usu mai Pupi Lam Yuen o Amerika Samoa ia Gogouli fa'ae'e le gafa e toalua, o Laina Tuifagu (f) ma Moala Poe Vaitagutu (m). 2). Usu mai Maiava Pelesa Moea'i Leota o Avao, Satoalepai ma Safa'i ia Gogouli o Utualii ma Lepea fa'ae'e le gafa e toasefulu, ono tama o Maiava Polumanaia (KS), Suisala Lemaota (P), Ma'aolegalu Lemaota (P), Aigamaua Lemaota (TI), Uluao Tuaoimalii (UT) ma Toomata Polutele (P), toafa teine o Faavaoa Papalii, Punalilo Maea,Tutulu Meafou ma Lemaota Sitoga Sua. O le aofaiga atoa o fanau sa tausia ma fa'afaileleina mai e Maiava ma Gogouli ma latou ola faatasi a'e ai i Utualii e toa sefulu ma le fa, e aofia ai Sarona (f) lea na usu mai i ai Moala Matini Elise o Leulumoega Tuai ma o ia o le tama matua a Laina ia Tafiga o Faleasiu, ma Semaia (m) le atalii matua o Moala Poe Vaitagutu ia Sialofi Su'ilaumea o Utualii lea na usu atu ia Tina Fuga Faasii o Lalomanu Aleipata.

Talitonu o le'a vaa tele i lou finagalo lenei faamaumauga ma sailiiliga o Tupuaga ma Faasinomaga o lenei aiga Sa Maiava, ma e manatu foi e poto a le tautai ai sasi lana atu i ama. Peitai mo le aoina mai o tupuaga na tupuga mai ai lenei itu paepae o le aiga, o se auala aoga mo le lumanai o fanau ina ia nofo iloa ma silafia tonu ai le alafua fesootaiga i faia ma gafa. E le o se fia iloa poo le fia sili pe faafia atamai ua mafua ai ona faia lenei itulau, ae o le manulauti ma le auga o aute le autu i le faamoemoe tonu ma le sa'o, ina ia aua pe taofia ai foi le fesopoa'i o fanau mo le lumanai pe fetaia'i ai i i'u o Gafa (faaipoipo pe nonofo). E maualuga lava se talitonuga a lenei aiga o se faleaoga aoga nei faamaumauga mo fanau i le lumana'i a le aiga mo nei ma-e lu-a. Afai e faleseu le aina i sa outou faitau, ia faamalulu atu pe afai e faiva ese Lopepe. E ta-liu ae popo'e i se finagalo ese i se lagona vaivai a lenei aiga Sa Maiava (Pelesa M. Leota), ma e tu lili'a foi i le To ae maniti tino i le Pisaga, peitai o le naunautaiga ina ia manino ma malamalama fanau o loo aumau ma nopia'i i soo se tafa o le lalolagi, o le upu a le atunuu "E lelei lava le motu o le pa a ua iloa"  

 

 Maimoa ma faafofoga i le saunoaga a le afioga ia Tualupetu i le faamanatuina o lona 87 tausaga i le aso 25 o Tesema 2008 lea sa faataunuuina faatasi ma le Reunion a le "Maiava Pelesa Leota Family"

 

Faafetai lava le asiasi mai, aemaise lau maimoaga i le taumafaiga vaivai a lenei tupuaga. O le naunautaiga lava ia fesootai gafa ma iu o gafa i soo se tafa o le lalolagi e ala i ni faamaumauga o loo i ai nei. Faamanuia le Atua i feau ma galuega o loo outou tautua ai soo se atunuu aemaise i totonu o ekalesia

webmaster: tpmaiava - Please send your aiga ata to: mail@maiavafamily.com